Алматыда полицейлер жылдамдықты шамадан тыс арттырған жүргізушілерді анықтайтын бағдарламаны іске қоспақ

0
0

Жылдың соңына қарай Алматы жолдарында жылдамдықты шамадан тыс арттырған жүргізушілерді анықтайтын арнайы бағдарлама іске қосылады. Бұл туралы Алматы ІІД бастығы Серік Күдебаев ІТ-индустрия өкілдерімен кездесуде айтты, деп хабарлайды ҚазАқпарат.

Фото: ҚазАқпарат

«Қауіпсіздікті цифрландыру» тақырыбымен өткен шарада ІІД басшысы енді кореялық тәжірибе пайдаланылатынын жеткізді.

«Ең көп жол-көлік оқиғасы Алматыда болады. Біз «Орташа жылдамдық» арнайы бағдарламасын іске қосамыз. Бұл — Корея тәжірибесі. Бұған дейін жүргізушілер камераға жақындағанда ғана жылдамдықты азайтып, одан өткен соң қайта арттыратын, яғни қай жерде қалай жүру керек екенін білетін. Жаңа жүйені Шығыс айналма жолы мен әл-Фараби даңғылының 10 учаскесінде пайдаланып жатырмыз. 2 айда 400 мың ереже бұзу дерегін анықтап, жалпы 200 млн теңге мөлшерінде айыппұл салынды. Талдауларға қарағанда, жылдамдықты 1 километр/сағатқа азайту жол апатын 3%-ға қысқарту мүмкіндігін береді», — дейді С. Күдебаев.

Оның айтуынша, жылдың соңына қарай автобустар арнайы жолақпен жүрген көліктерді анықтайтын видеокамералармен жабдықталады. Оларды сатып алу үшін тендер өткізіліп жатыр.

Оларды желтоқсанның аяғына дейін қоғамдық көлікке орнату жоспарлануда.

 

 

ОСТАВЬТЕ ОТВЕТ